व्यंगचित्र

(इन्स्टाग्राम आणि फेसबुकवर वारंवार येणाऱ्या फोटोंना लक्षात ठेऊन:)


डोळे होते वटारलेले
तोंडाचा चंबू झालेलाच,
सुजलेल्याशा ओठांवरती
बहुदा पानाचा रंग चढलेला

फिल्टर नक्की पांढरा होता
का पावडर जास्त लागलेली
भुताटकीला भिऊन किंवा
चेहऱ्याची लाली लपलेली

ग्रीष्मातही डोक्यावरती
फुलांचा मुकुट घातलेला,
त्याच्यावरती रेबॅनचा गॉगल
हेअरबॅन्ड म्हणून लावलेला

सोनेरी रंगाची एकच बट
बोटावर होती कुरवाळलेली
दुसऱ्या हातात ग्लासामध्ये
बिअर होती फेसाळलेली

लाल भडक वन-पीस नेसून
हाय चेअर वरती बसलेली
आठ इंची हाय हील मात्र
लपवायची तेवढी राहिलेली

दीड-दोन हजार लाईक्स होते
कमेंट्सचं दव पडलेलं
तरुणाईचं टेस्टोस्टेरॉन
नको तेवढं वाढलेलं

स्वतःमध्येच रमून तिला
कधीच ना हे कळले होते,
फोटोमध्ये व्यक्ती नसून
एक व्यंगचित्र बसले होते